طَــــرْح عـَـــارْبـَـه ....!!

[إبراهيم المهنا]

يقول من عينه من الدمع ساربه=عقب انهصر وسط الظهر من مضاربه
ودلا يجاذب ونّته من غبونها=والجور يركي بالقدم فوق غاربه
تفلّتت من وسط كفي مقاضبي=وزرت عليّه لحيتي مع شواربه
عقب الدخون وعاطر الهيل والنبا=خلّيتها من صادق الدمع شاربه
هنيّت من لا لاعه الشوق والهوى=ولا وطا ديبانها مع عقاربه
وهنيت من هو لا دنا الليل مهتني=وهنيت من نفسه مع الوقت طاربه
ماهوب مثلي حزة الضيق تبتدي = اليا اخفقت شمس الضعيفين غاربه
أجرها واجرها ثمّ اجرها = وادنّها من كاربه فوق كاربه
يروح ليلي بين دمعي وحسرتي=والعين للنّوم المسمّى محاربه
ياوجد حالي منك يا خشف يالذي=على الحشا والعين والقلب داربه
ياوجد حالي منك وانته تسومني=وانا يديني عن مواصلك تاربه
ياوجد حالي منك يالريم يالمها= ياللي عن الرمّاي والقنص هاربه
أن جيت ابيّح ما بسدي لسدّها = اشفاي ما ادري ياملا ويش صاربه
أخاف ياخذها على الطيش ردّها = والا تشدّ بزمْلها من مضاربه
ياوجد حالي ضاع مني دليلها = وهي على الحالين لا شك خاربه
تقبل وتشمخ مهجة الروح لاجلها=وتدبر وقلبي لاهب الشوق ثاربه
لا نادمتني بالمحبة اوْصلها = ولا نهتني يوم لزّيت قاربه
ضاعت بي الحيلة وانا من قرومها=يقوله اللي وافيات(ن) تجاربه
منيب حيالله من القوم يافتى=الا عريب وراضع(ن) طَرْح عاربه
ضاقت وياربي تعجّل فروجها=أقولها والعين بالدمع ساربه

[شـــــديد]

صح لسانك وصح بدنك اخي على جمال ما تضع من قصائد اخي ابو ضاري

[إبراهيم المهنا]

صح لسانك وصح بدنك اخي على جمال ما تضع من قصائد اخي ابو ضاري


الرائع في كل شيء / ابو سامي

صح بدنك

شكرا من القلب لك ولحضورك والكريم دائما

ولاهتمامك ...

تقديري واحترامي لك وبانتظارك دائما

[ابوعبدالرحمن]

ضاعت بي الحيلة وانا مـن قرومهـا
يقولـه اللـي وافيـات(ن) تجاربـه
منيـب حـيالله مـن القـوم يافتـى
الا عريب وراضع(ن) طَـرْح عاربـه
الله الله ماهذه الدرر التي ينثرها فاك لافض فوك ابو ضاي

[صمت مغتربه]

ياوجـد حالـي ضـاع منـي دليلهـا
وهي على الحاليـن لا شـك خاربـه
تقبل وتشمخ مهجة الـروح لاجلهـا
وتدبر وقلبي لاهـب الشـوق ثاربـه
لا نادمتـنـي بالمحـبـة اوْصلـهـا
ولا نهتنـي يـوم لـزّيـت قـاربـه
حالان احلاهما مُر ...

الشاعر الكبير // ابراهيم المهنا

الصمت في حرم الجمال جمال ...قصيده قلما قرأت في جودتها ...

دمت مبدعــا ..

[ابوماجد]

الله الله عليك ياشاعرنا الكبير ابوضاري

صح لسانك في كل ماتكتبه يابوضاري

نفنخر بك شاعرنا والى المزيد ياشاعرنا

[الزعيم]

ياحضك من شاعر تعرف تكتب القصيدة زين
اه اه اه ابي اصير مثلك
الف مبروك على القصيدة الجميلة الله لايضرك

[إبراهيم المهنا]

ضاعت بي الحيلة وانا مـن قرومهـا
يقولـه اللـي وافيـات(ن) تجاربـه
منيـب حـيالله مـن القـوم يافتـى
الا عريب وراضع(ن) طَـرْح عاربـه
الله الله ماهذه الدرر التي ينثرها فاك لافض فوك ابو ضاي

الغالي أخوي / ابو عبدالرحمن

ياهلا وغلا فيك وبحضورك المشرف دائما

صح بدنك

شكرا من القلب

[الدحمي]

صح لسانك ياابوضاري
وارجوا منك قبول هذا اللقب ((( شاعر المهنا)))
الى الامام

[ابولمار]

بحثت في الابيات اجملها لاقتبسها

ولكن للاسف وجدت ان كل بيت اجمل من الثاني

الله لايحرمنا هالابداعات المتدفقه من الشاعر الصادق

لك احترامي اخي ابوضاري

[مهناء]

صح لسانك يابو ضاري قصيده جميله جدا جدا في الحقيقه وفي هذا الزمن المتلاطم شعريا قلا مانراى مثل هذا الابداع