بريده ديرة الفلس والدجه

[سيف الخوالد]

اليوم يوم وديت بنتي للكليه التقنيه تذكرت ان هالموقع سبب لي نوع من العمى فقلت ابروح مع شارع المدينه اواصل لشارع الخبيب بقص نضارات طبيه

ومن يوم قطعت اشارت ميد الا النار تطلع مع الكبوت اوله ريحه ودخان احسب من سياره ديزل قدامي قلت ابسقط عليه ومن يوم سقطت الا النيران مع الكبوت واسفط والا معي هاك السجاده وافتح الكبوت الا الدينمو قاب نيران والحمد لله تصرفت وطفيته وبعد كذا كانت الساعه تسع الا ربع
بعدين اناظر يمين يسار وش الدبره وش الحيله الناس كل واحد عاض شليله ومتلطم ودايس طبلونه

ما تعودت ولله الحمد اجدع نفسي على اي مخلوق حتى اني اشر بيدي لسياره خاصه هاذي تبطي تاكل وتشرب معي ولا اسويها

ما لقيت مسلم يوقف لي مع العلم ان هيئتي ما ني لا عامل وشخاذ ولا شكل سربوت

بس لا خوه ولا شيمه

استهلت وبغيت الناس نايمه والزملاء والاخوان ياكثرهم بس نامر عليهم بس فيه مصيبه ثانيه


نسيت جوالي اللي اعرف له بالمحل
ومعي جوال اي مات طاف فيه هاليومين بس ما ادري وشلون اطلع الاسما والارقام ما اعرفها يعني اتصال مقطوع

ولا لقيت سطحه الا الساه 11
بعدين وداني السليم وركبت دينمو والحمدلله وصلت مع الصلاة للبيت

بس الصراحه وصلت وقسم بالله اني ما اقدر اقف من الشمس ومطارد العمال اللي بالورشه
ولان بنتي بعد برجع له وحده ونص

لا ليموزينا ت

ولا خدمات

ولا ناس تقدر

هذي بريده
تحياتي

[هبس]

الحمد لله على السلامة واشوى انا الدعوى ماتعدت الدنمو
صحيح هذا موقف متكرر ببريدة وبغيرة ومر على كثير من هالمواقف
اذكر مره بطريق حائل انقطع السير معي ما وقف لي الا هندي على تريلة ومحمل تبن بعد يمشي 60

لكن السؤال اللي يطرح هل نحن ممن يقف لمن يتعطل على الطرق او نقول مستعجلين

[سيف الخوالد]

ههههههههههه



والله انك صادق يا خوي هبس

لاننا من هالديره


بس رح لهل الشمال وتشوف

[هبس]

والله يابو عل انا كل يرة عشت به شوي
كلن به حقه من الطيب والردى
شمال وجنوب احد يرفع الراس واحد يوطيه

[غنام التميمي]

صدقت يا ابومحمد ,, كل ديره فيها الزين والشين
لكن الاسبوع الماضي تعطلت سيارتي ببريده وجلست ساعتين ما وقف لي احد
وبعدها بثلاث ايام , تعطلت بحايل وما تم لي خمس دقايق الا واقف عندي سيارتين
لا تحسبون اني ابالغ .. لا والله هذا الصحيح

[هبس]

اخي غنم انا لا اقصد ضرب الأمثله ولا انتقاص احد أبداً بل بالعكس
انا عشت في حائل ثلاث سنوات وربعي هناك الان متواصل معهم
بشكل كبير جداً جداً وغالين على مره .. حتى انهم عندي بـ15 شعبان
هم واهلهم ....

وعشت بضليع رشيد ثث سنوات وكذلك فيه تواصل نوعاً ما

فتره بسيطة بالمحيلاني وسنة في الفوارة

ومع كثرة الأسفار والروحات

الناس فيهم فرق ماهم واحد

اذكر مره تعطلت وانا جاي من ضليع رشيد
وقف لي سيارتين والله ما امدانا نشر انا وخويي
وسبق اني قطعت بنزين وانا مريض ما اقدر
امشي من التعب وبعز الظهر والله اني مشت
للمحطه روحه ورجعه ما احد وقف...........


الناس تخلفك انت اعر وتعرف

[سيف الخوالد]

اخوي هبس


اكبر منك بيوم اعلم منك بسنه


شف اهل الشمال كانك من الديره عطوك ركبه لانهم مع بعضهم لك عليها



ان كنت اجنبي والله ابشر بعزك


وشت تقول بهالكلام عندك عليه تعليق

[ابو شكري]

يارجال كل ديرة فيها الطيب والردي

واليوم صحيح قل المعروف الله المستعان

بس مازال في الناس خير


ويليتي مريت من عندك ياسالم كان وقفت وقمت باللازم لك


وشكراً لك وننتظر المزيد

[سيف الخوالد]

مشكور كلك ذوق يا بوشكري وكلامك في محله بس حبينا ننشاء موضوع للنقاش ليس الا

وانا الحقيقه اعتبر هذي اخر موضوع لي بالمنتدى لاني كتبت موضوع قبله باني بغادر الموقع بس لاحظت ردك وما حبيت اغادر لين ارد عليك

تحياتي لك

[أبو صااااالح]

الطيب لاهل الطيب ياراعين الطيب .....أنا سكنت بريدة أيام الجامعة وبه كثير من الرجال الطيبين و الكرما والله وأحد أستأجر لنا شقه ودفع أجاره سنة كاملة """"""""""""""

[أحمد]

ياناس أرفقوا اصابعكم ماهي وحدة ......كل بلد فيه الشقردية الي يبيضون الوجه وفيه من الدلوخه


والتقيم السريع على أي بلد من دون دراسة ووضع استبانات وغيرها ..حتى نحكم على هذا البلد ...


انا معك أخوي سالم نفقد سيارات الأجرة في كثير من شوارعان لا تجدها الإ في شارع الخبيب ..

الحمد لله على السلامة ....

[أبو صااااالح]

أخي سالم المهنا أهل الشمال يوقفون لأي واحد سوى من الديرة أو أي هندي ومع بعضهم تمااااام ،،،ولاااااااااااااايعطون ركبه

[سيف الخوالد]

شكلي طبيت وما احد سمى علي يا بو صالح

اولا مشكور على تجاوبك


والثانيه انا وغيري من الزملاء كل يقول ما عنده تحتمل الصواب وتحتمل الخطا وبالتالي كثرة المناقشات تثري الموضوع وتعطيه حقه والعاقل من اتعض

الف تحيه وتقدير على تجاوبك ومشكور

[راع الصوال]

الحمد لله على السلامة يابو علي
قايلة من زمان ديرة الدجة في وسط الديره وبغى ابو علي يموت اخسو يا قوم وش كاري

[سيف الخوالد]

جزيت خيرا وزوجت بكرا يا عمدتنا

مشكور على مرورك الكريم

لك تحياتي

[ابولمار]

http://img523.imageshack.us/img523/2253/besm8dg4.gif



http://www.w6w.net/album/35/w6w2005042121364519162251d9a.gif



الحمد لله على السلامة يابوعلي

طيب ماحفظت احد ارقام اقرب الناس لك

يعني اخوك ولد اخوك فلان علان

يعني

لكن ماتستاهل والله يابوعلي البهذلة

وليتي مار مع ذاك الشارع ومتشرف بخدمتك

الله لايعيدها عليك ويجعله نهاية المصايب

وللمعلومة حاولت ارسلك على الخاص ولقيتك مانع قبول الرسائل عندك

عموما اهم شيء نكون على تواصل

المزيد.....

هذا وتقبلوا فائق تقديري واحترامي

·.¸¸.··.¸اخوكم ابوريان¸.··.¸¸.·



http://www.w6w.net/album/35/w6w2005042121364519162251d9a.gif

[سيف الخوالد]

المشكله انك برمضان

والناس نايمه يعني ما اقدر اتصل تقريبا الساعه 9

ما احد يوقف وحنا ما تعودنا نحلت ارواحنا

بس بالاخير وانا واقف واحد مر وهد ما فهمت الموضوع ورحت بسرعه قلت بس ابي شارع الاربعين علشان استاجر سياره او اخذ سطحه ابيك تقدمني شوي

الاحراج وشلون الرجال واقف يبي المغسله ما هو علشان بس صار حظي وانحرج ووادان عند الجوزات ولقيت كل محلات التاجير مقفله وعقب مده جاب الله لي واحد فله راعي سطحه رايق وجبناه وما طولت الامريكي حبيب ما كملت توقيفه عشر دقايق الا مركب دينمو جديد مسمارين فكه بثلاثين ريال والدينمو جديد ب150ريال والحمد لله بس شموس والله اني وصلت البيت افمي لاصق

لك اطيب تحيه يا بو ريان ومشكور على مرورك

[المحروم]

يا ابو علي كل ديره فيها الطيب والردي

تقبل مروري

[سيف الخوالد]

كلامك صحيح بس يوم كتبناها كنا حمقانين
الله يعطيك العافيه

[بدرالهبيري]

اخوي سالم انا اشوف ان الحكم بوقت غضب مايــــــــصلح
وخصوصا ً انك تقول انك مااشرت لاحد يعني واقف فقط ..
واللي يمر بجانبك ولايشوفك تشر من الطبعي انه ماياقف ..

وانا من ناحيتي مر علي موقف ببريده يوم من الايام فقد
وجدت احدهم يشر ووقفت عنده وطلب مني اوصله لصناعية
بريده علما ً انني كنت حول سلطانه وتفاجئت انه يوم جيت انزله
طلع ريالين يبي يدفعها لي :(
المهم اخبرته اني ماني تكسي فتفاجئت انه قال لي ان
اكثر اللي هنا خصوصي ريالين وان لايوجد ليموزينات ببريده
المهم اني نزلته وشكرني ..

طبعا ً استغربت شلون بريده المدينه الكبيره المترامية الاطراف
مافيها ليموزين والله لو فيه شركة ليموزين مااحد شال هم
عطال الموتر وين ماتاققف ليموزين قدامك وعشره ريال المشوار
والله ولااجلس بالشموس والا بالساعات امشي ..
أنا أقترح لاحد التجار انه يقوم بإشاء شركة ليموزين وربما تحل
الكثير من المشاكل لأهل البلد ..
تحياتي وتقديري .. بدرعيد ..