الحنشل

[سيف الخوالد]

هذي قصه كان ولدي رحمه الله يقصه علينا وفيه عبره وفايده عن قيمة النصيحه



كان في يوم من الايام ناس تبي تحنشل وكان فيه ولد صغير توه متزوج ويوم عزمو على الحنشله

قال ابروح معكم احساس بالمسئوليه بعد الزواج فرفضوا بحجة صغر سنه

ولكنه قرر ان يقوم بالبحث عن مصدر رزق بنفسه


راحوا في جهه وهو راح فيه جهه اخرى ولف بالوسيعه وبالاخير حصل رجال ووافق انه يشتغل عنده

راعي ابل وعن كل سنه يعطيه بكره او قعود ووافق الرجال

بس راعي الحلال شرط عليه شرط وطلب منه الموافقه عليه


وكان الشرط ما تطلع بالمراقيب والاماكن المرتفعه في وقت طلوع وغرب الشمس


وافق واشتغل عنده ثلاثين سنه وبعد ذلك تذكر وصية الرجال ويوم جا يوم من الايام طلع المرقاب مع غياب الشمس

ومن يوم طلع ويتذكر ليلة زواجه وامه


رجع للرجال وقال انا قررت الرحيل وابي حلالي


قال الرجال له انت اخلفت النصيحه

قال نعم

قال لك عندي ثلاثين ناقه وقعود وجاب الحريم وقال جهزو له ثلاثين عقال

ثاني يوم عقل له ثلاثين من الابل وجلس معه وقال له يا ولد عندي لك ثلاث نصايح


بس كل نصيحه تطلق لي عشر من الابل تشتري النصايح


قال نعم

قال الاوله هي


لا تخاوي ازغر العينين افلج السنين

فك له عشر من الابل

قال الثانيه ما تنام بالمسايل حسب ما فهمته والشعبان قال شريت

فك له عشر من الابل

قال الثالثه ان طرى لك شي وانت تركض امش وان كنت تمشي اقعد وان كنت قاعد نم وان طرى لك شي اليوم سوه بكرى

قال شريت وفك له العشر الاخيرات من الابل

راح شقاء ثلاثين سنه

قال عندي لك رحول تدور فيها اهلك وجهز له رحول وزاد ومشى الرجال


بقية القصه طويله يمكن تكون على ثلاث مراحل وما ني قادر انزلها كلها اليوم اصابعي حاصل لهم ضربه وماني قادر اواصل


تحياتي

[المجهول]

اخي سيف الخوالد

رحم الله والدك

وبيض الله وجهك على هذه القصه
وننتظر البقيه بعد شفاء اصابعك

[سيف الخوالد]

اخي سيف الخوالد

رحم الله والدك

وبيض الله وجهك على هذه القصه
وننتظر البقيه بعد شفاء اصابعك


ابشر اخوي ابو عرام بعطيك الباقي الليله ان شاء الله

تحياتي

[سيف الخوالد]

مشى الرجال على الرحول


وهو طالع من الديره الا ذاك الرجال متلطم قال وين يا رجل قال للجهه الفلانيه

قال ما تبي لك خوي قال الله يحييك

قام وركبه معه على الرحول ومشوى حتى جاهم الليل وبعدين وقفو يبون يرتاحون ويتعشون


المهم من يوم مشى الرجال ما شاف خويه الا عيونه

جلسو صلحو عشاهم ويوم حضر العشاء جاء الرجال وفك اللطمه ومن يوم فكها الا هذا الرجال اللي حذره منه

معزبه ازغر العينين افلج السنين


المهم بعد العشاء قام الازغر قال ابنام وراح ورى ذيك الشجره وسوى نفسه نايم يبي الرجال ينام بسرعه مستعجل على رزقه

بس الرجال حط وصية معزبه بين عيونه وقام ونسدح بالفروه له تحت شجره بعيده علشان ما يشوفه الثاني

وبعدين انسحب من تحت الفروه وراح ورى شجرة ثانيه وجلس يراقب الرجال اللي قاعد كل شوي يرفع راسه ويطمنه


المهم خلا شكل الفروه كأنه فيها ويوم جاء الليل ليلين والا الرجال يوم جاء يتهبد بالخنجر وياقف فوق الرجال ويتعزوى

وهو يدق الخنجر بالصدر حسب توقعه يبي يقتل الرجال وياخذ ما معه ومن يوم سواها الا الرجال متقفيه بالعجراء وهو

يصكه مع راسه والا ما يبي غيرها والا منسدح جنب الفروه ويكمل عليه وياخذ ما معه من حلال وكان معه ذهب وهو

يحملها على رحوله ويتكل على الله في مشواره للبحث عن اهله

الجزاء الثالث بكرى ان شاء الله

[سيف الخوالد]

واصل الرجال البحث عن اهله على رحوله



واثناء ذلك حصل بدو محيلين للبحث عن الربيع فطلبوا منه ان يقوم برعي الغنم والابل وما لديهم من حلال اثناء هذه الفتره وفي نفس الوقت يبحث عن اهله وقبل الرجال بذلك وبدى يسوق الحلال خلفهم وين ما راحو



حتى جاء يوم من الايام كان فيه القوم يبون يبيتون في وادي كبير لسهولة الارض ولكن الرجل طلب من اهل الحلال ان يخرج بالحلال في منطقة مرتفعه وينتظرهم حتى يواصلون سيرهم


فظهر بالحلال المنطقه المرتفعه وبات هناك وبالمقابل معازيبه نامو بالوادي اصبح الصباح انتظرهم ما جاه احد رجع لمكانهم ما لقاء الا بقايا اشلاء ما مسكته الاشجار ولا وجود لاحد شايلهم الوادي عن بكرة ابيهم


رجع للحلال واساقه معه بالرحله للبحث عن اهله وتذكر قيمة نصيحة الرجال وكيف انه ما هي خساره بعد ان دفع فيها عشر من الابل وهي مقابل اتعاب عشر سنين

الجزاء الاخير الليله ان شاء الله

مشكورين

[سيف الخوالد]

استمر الرجال في رحلة البحث عن امه وزوجته


وكان يقوم بالسؤال عنهم عند كل قوم بطريقته الخاصه بحيث لا يحسس احد انه له بهم صلة قرابه كان يسأل عن اسمه شخصيا

حتى وصل لعرب افادوه بأنه هذا الشخص اللي يسأل عنه منهم وأنه رحل قبل ثلاثين سنه ولم يعد لاهله ولا يعرف مصيره


فقام وبناء له بيت صغير على اساس انه سوف يقيم عندهم بصفه مؤقته وبدا بالتعرف على الرعيان ويبحث عن الصحيحين على ما قالوا الرقله بصحيح العباره وكان يحلت عليهم هرج وياخذ منهم ما تيسر من علوم حتى وصل لبيته


وبدا يراقب بيته من بعيد لبعيد وكان يشاهد امه وزوجته ويشوف رجال بالليل يجي ويدخل بيته فقام بالليل بالتجسس على البيت وشاهد الرجال ينام مع زوجته فقرر قتله وذكر نصيحة الرجال وكيف استفاد من النصائح اللي قبله

فقرر التمهل حتى حين


فبدا مره ثانيه يعزم الرقلات على ما قيل ويأخذ من علومهم وشوي شوي اكتشف ان الرجال يصير ولده وانه يرعى بالنهار وبالليل يجي ينام عند امه


وبعدها رجع لامه وزوجته وولده سالم غانم وانتم سالمين غانمين

[عفتي في حجابي]

وانت سالم اخوي سيف

الوالد حينما قص عليك هذه القصه مؤكد لم يقصصها عبثا

ولكن يريد منك ان تأخذ الفوائد منها ففيها فوائد عضيمه
1-وجوب سماع النصيحه ان كانت من عاقل
2- وجوب عدم التسرع
3- الحذر من بعض الرفقاء
4- بالذكاو بطريقه غير مباشره تقدر ان تحصل على ماتريد من اخبار

رحم الله ابائنا واسكنهم فسيح جناته

[شـــــديد]

اخي سيف رحم الله الوالد قصص جميله كان يرويها وكنت كلما بدى بقص قصه ادخل معها
جو وكان رحمه الله ممن يتقنون طريقة روايه القصه لدرجة انك تذهب بخيالك مع القصه
مشكور اخي سيف

[سيف الخوالد]

وانت سالم اخوي سيف

الوالد حينما قص عليك هذه القصه مؤكد لم يقصصها عبثا

ولكن يريد منك ان تأخذ الفوائد منها ففيها فوائد عضيمه
1-وجوب سماع النصيحه ان كانت من عاقل
2- وجوب عدم التسرع
3- الحذر من بعض الرفقاء
4- بالذكاو بطريقه غير مباشره تقدر ان تحصل على ماتريد من اخبار

رحم الله ابائنا واسكنهم فسيح جناته


كلامك صحيح



بس كنا اول الوحد ياصل العشرين وفيه شي من الدلاخه وقل العرف


هالحين اللي ما درس ياكلك اكل



دنيا وش يبي يصير بعدين الله اعلم


مشكوره على المرور


تحياتي

[سيف الخوالد]

اخي سيف رحم الله الوالد قصص جميله كان يرويها وكنت كلما بدى بقص قصه ادخل معها
جو وكان رحمه الله ممن يتقنون طريقة روايه القصه لدرجة انك تذهب بخيالك مع القصه
مشكور اخي سيف


مشكور ابو سامي


تقبل تحياتي

[دحوش]

والله قصه روعه والله يانا تحمست معه