الغرام

[ابو عبدالعزيز]

جار الغرام وبيح السد تبييح=وانا على سدي حريصٍ عن البوح
يا فريح انا بشكيلك الحال يا فريح =يا فريح انا والحب طارح ومطروح
على عشيرٍ جرح القلب تجريح=بعثر لمام القلب والحال والروح
النوم من عقبه بعيني شلافيح=يا سارقٍ نومي من العين مسموح
احرقت لي قلبي بجمرٍ صلافيح=لهيبها جوف الضماير لها فوح
يا متيهٍ لوعات حبه مطاويح=في مهمهات القلب وراد وسروح
يرعن حشاش القلب ليل ومصابيح=زادن علي جروح وجروح وجروح
جرحٍ تجدد في حشا الروح يا فريح=من جادل حلو الطبايع ومملوح
اليا هرج ما كنه الا تسابيح= واللا حمامٍ ساجعاتٍ على دوح
لي في هوا خلي قصيد وتواشيح=وله في هوا قلبي عمارات وصروح
اليا غاب عني قمت اهل المسابيح=من موق عيني دمعها صار مفضوح
وا جض قلبي جض من صابته ريح=واللا جضيض اللي من الحرب مسدوح
على وليف ملح القلب تمليح=زاد الحلا والملح من غير مصلوح
بيني وبينه مغلقات المفاتيح=ما عاد يا صلني وانا ماقدر اروح
انا بلاي وعلتي من مشافيح=اللي يلاغونك على السد وش نوح
ابا اتهنى والليالي مراويح=والعمر وشو غير جسم به الروح

[شـــــديد]

قصيده غراميه رائعه الله يعطيك العافيه لاكن لم تذكر اسم الشاعر

[ابو عبدالعزيز]

مشكور ياشديد .............

هذي من قصايدي الله يطول عمرك

[شـــــديد]

صح لسانك الصراحه جدا رائعه مبدع ابو عبدالعزيز ولاتحرمنا من جديدك